ئەنجومەنی سیاسی هاوپەیمانی نیشتمانی كۆبوونەوەی خۆی ئەنجامدا، تێیدا دوو هاودید كە بەیەدەگ دەرچوون بۆ ئەنجومەنی سیاسی لەسەر بنەمای دەنگی هاودیدان وەكو ئەندامی ئەنجومەن دیاریكران بەهۆی پێویستی ئەركی هەنوكەیی ئەنجومەنەكە.
دوێنێ 2 شوباتی 2019 لە سلێمانی، بە سەرپەرشتی ئارام قادر سەرۆكی هاوپەیمانی نیشتمانی ئەنجومەنی سیاسی كۆبویەوە.
لەیەكەم برگەی كۆبونەوەكەدا بەگوێرەی ماددەی 8ی بڕگەی 10 لەكارنامەی ئەنجومەنی سیاسی و لەسەربنەمای دەنگدانی هاودیدان لە كۆبوونەوەی فراوانی 1ی شوباتدا، هەریەك لە (جەلال ئەحمەد و د.ئاشتی ستار)ی وەك ئەندامانی ئەنجومەنی سیاسی دەستنیشان كران. هاوكات لەسەر پێشنیاری ئەندامانی ئەنجومەنی سیاسی بەپێی كارنامەی ئەنجومەن “بانگهێشتی هەردوو ئەندام كرا بۆ بەشداری لەكۆبونەوەی ئەنجومەنی سیاسی”.
لای خۆشیەوە سەرۆكی هاوپەیمانی پیرۆزبایی خۆی ئاڕاستەی هەردوو ئەندامەكەی كرد و هیوای خواست لەكارەكانیان سەركەوتووبن.
لە برگەی دووەمی كۆبونەوەكەدا ئەندامانی ئەنجومەنی سیاسی جەختیان لەسەر پێكەوەكاركردن كردەوە و باسیان لە گرنگی دانانی پلانی ئایندە كردەوە بۆ زیاتر بەهێزكردنی پێگەی هاوپەیمانیی نیشتمانی.
