هاوپەیمانی ڕەتیکردەوە هەڵوەشابێتەوە و لە ڕاگەیەنراوێکدا ئاماژەی بەوە کرد حزبەکە موڵکی شەخس نییە و جەختیش دەکاتەوە تەنها هاودیدان دەتوانن بڕیار لە چارەنوسی حزبەکەیان بدەن.
لە ڕاگەیەنراوێکدا هاوپەیمانی دیموکراسی و دادپەروەری ئەوەی خستەڕوو “چەند ڕۆژێکە لە میدیاکانەوە بە مەبەست و ئامانجی شەخسی و سیاسی باس لە هەڵوەشاندنەوەی هاوپەیمانی دەکرێت”.
لە ڕاگەیەنراوەکەدا ئاماژە بەوە کراوە “هاوپەیمانی دیموکراسی و دادپەروەری پرۆژەیەکی سیاسی مەدەنیە و خاوەنداریەکەی دەگەڕێتەوە بۆ هاودیدانی هاوپەیمانی و موڵکی هیچ کەسێك یان کەسیاتی و گروپێك نیە تا بتوانن تاكلایەنە بڕیار لە چارەنوسی بدەن”.
هاوپەیمانی لە راگەیەنراوەکەدا ڕوونی کردوەتەوە “ئەو هەواڵانەی باس لە هەڵوەشانەوەی دەکەن ڕای شەخسین نەك هاوپەیمانی”.
لەهەمان کاتدا جەختدەکاتەوە “هەر دەنگۆیەك لەو بارەیەوە ڕا و بۆچونی شەخسیە و، ئەو هاودیدانەی بڕیاری بەردەوامیان داوە، دەتوانن بڕیار لەسەر چارەنوسی هاوپەیمانیەکەیان بدەن نەك هیچ کەسێکی تر”.